政情：楊岳橋表情浮誇 睇繪本變睇鹹書
立法會議員楊岳橋（AY）一向都表情多多，佢日前就去咗參觀即將開幕嘅圓洲角公共圖書館，期間亦不忘搞笑本色，做出浮誇嘅表情拍照，惹嚟網民笑稱似閱讀黃色刊物。
AY喺fb上載咗幾張參觀圖書館嘅相片，而其中一張係佢喺名為「JJ Picture Books」嘅書架前睇圖書，竟然露出一副好驚嘆嘅表情。可能因為書架上嘅名稱同AY嘅表情，隨即惹起網民熱論，有網民問佢睇緊嘅係乜嘢書？可能因為書架上嘅名稱，亦有網民心邪咁話：「個樣令人諗起另一個J」，於是有網民就回答話係兒童繪本。更有網民指AY表情太誇張同浮誇，好似睇緊黃色刊物咁。
呢張相令到有網民聯想到另一個J，再加上AY露出個咁誇張嘅表情，肯定令網民有無限聯想，或者佢只係想搞噱頭，但依家就玩出火，搞到圖書館好尷尬。另外，AY又假扮小朋友，瞪大雙眼、乖巧地坐喺椅子上，有網民直指：「扮細呀！」亦有網民指佢一個人坐兩張椅子，叫佢減肥嘞！