中環出更：善德辦「學堂」 釋放婦女勞動力
香港人口老化，社會勞動力不足，偏偏有好多婦女因為要照顧家庭而未能投身職場。善德基金會早前舉行春茗，主席董吳玲玲講起未來計劃時透露，今年打算推出針對小學同幼稚園學生嘅學堂計劃，搵高中學生幫手喺課後睇住小朋友嘅功課，咁樣一眾媽媽就可以放心出去工作，釋放婦女勞動力。
董太話善德成立兩年幾，透過關愛科研青年發展計劃聯繫咗一班中學生，學堂計劃可鼓勵呢班學生積極做義工回饋社會，亦可以喺教完功課之後，教小朋友認識中國傳統文化。咁好嘅學堂計劃只開一、兩個梗係唔夠，所以希望全港十八區都有，佢哋正搵緊機構一齊合作。
同場仲有永遠名譽會長葉鍾佩雲、常務副主席洪少陵、副主席蕭何元鳳、總理梁天富同董太老公董中浩等人。葉太早排喺荃灣遇上五車連環車禍，雖然唔係好嚴重，但期間要照顧受傷嘅司機、錄口供，又要搵人拖車，從未試過咁大陣仗，難怪佢仲未驚完，笑稱今年犯太歲，好彩攝咗太歲咋！
王雲仙暫停運動想造人
轉頭見到常務副主席藍國慶同太太王雲仙（Mina），卓妮見藍國慶身形保持得咁好，原來佢經常由大埔工業邨嘅公司沿住海濱徑慢跑到太和，然後再行返公司，全程大約一小時。Mina笑稱初期都跟住跑，但係成日只能望住老公嘅背影，後來索性買架單車踩。不過最近佢調理身體想生BB，醫生叮囑唔好做太劇烈嘅運動，所以暫時唔踩住喎。
卓妮