政情：公投甩轆 戴耀廷搞乜衰乜
佔領行動發起人、港大法律系副教授戴耀廷早前聯同多個團體組成「公民聯合行動」，仲籌辦埋「2017特首選舉民間全民投票」。尋日又發生甩轆事件，實體票站突然被取消，事關公投喺十號開始直至下星期，但位於理工大學嘅票站尋日就取消咗，短短兩日就搞成咁，真係出師不利囉！
理大票站兩日即取消
戴耀廷尋日解畫，指理大校方職員前日向票站嘅義工同學生表示，學生會冇權將地方借畀理大社會研究中心舉辦投票。佢仲形容，話校方對學生施加極大壓力，所以最終決定將有關票站取消，改喺附近天橋嘅位置設服務站協助市民。
佢仲話，以往有民間團體曾經成功借用場地做票站、甚至今次另外兩個喺大學內嘅票站都係透過學生會借場地。佢要求校方應交代拒絕借場地嘅原因，同時亦質疑係咪涉及政治考慮。
校方回覆傳媒查詢時話，已安排足夠人手應付今次嘅投票活動，但其後獲知會學生會將唔會喺投票當日負責該房間開門鎖，校方按規定唔借房間畀外間團體，又重申校方冇參與主辦方同學生會就設置票站嘅討論同決定。
曾被揭嚴重保安漏洞
話時話，戴耀廷搞嘅公投連番甩轆，繼早前投票系統有嚴重嘅保安漏洞，搞到畀人去個人私隱專員公署投訴同換系統之後，位於理大嘅實體票站又取消埋，佢真係搞乜衰乜。