政情：撐建制候選人 漢奸黎被轟瘋狂

韓連山指漢奸黎喺佢旗下嘅《蘋果日報》論壇版撰文《不要讓陰謀得逞》，為咗撐鬍鬚曾，大罵胡國興「鎅票之心昭然若揭」，文中又話：「韓連山這個人明明看得出是中共的臥底」，並狠罵旗下日報評論版嘅編輯「也真的夠天真無邪了……還不時把版面給他發表些似是而非的言論做甚麼？」韓連山直指作為本地報章嘅老闆，為咗支持一位參選特首嘅建制人物，「瘋狂起來，也挺嚇人的！」

被指共諜 韓連山促拿出證據

對於被指係中共臥底，韓連山批評漢奸黎咁講係高調抹黑，又反問「我這退休教師居然也獲中共青睞？何德何能？當上「臥底」也不自知？」佢又直指漢奸黎應該攞證據出嚟，究竟佢幾時同點樣得到中共「寵幸」？

韓連山更指出，作為資深傳媒人，當然明白干預編輯自主係死罪，萬萬不可越雷池半步，佢指漢奸黎現在公開鞭撻自己嘅僱員，更顯示漢奸黎已經不辨是非，以情害意，令人惋惜。

針對漢奸黎嘅鎅票論，胡國興亦發表聲明回應，稱以一生人嘅誠信，講出真心話，又反駁漢奸黎畀佢嘅兩大罪狀，首先否認自己係中共臥底，反斥漢奸黎講嘅係廢話。

以背景作指控 胡國興斥廢話

漢奸黎喺文中指胡國興嘅兒子胡雅倫係中聯辦統戰組織菁英會同香港青年聯會嘅成員，更係茂名市嘅政協，而胡國興嘅助選團主幹鍾瑞珍以前係民建聯葛珮帆議員嘅助理，「（阿爺）找胡官出來變臉扮泛民代表，設下個鎅票機制，令傻呼呼的泛民分散票源投到口是心非的胡官（胡國興）身上」。

胡國興批評漢奸黎以其背景作指控，反問「難道候選人妻兒有美國護照，就是CIA派來的嗎？」佢跟住又反問：「難道候選人做過港督的副手，就是英國特務？這些英文叫baloney。廣東話叫『廢話』。」佢又話：「這裏是二○一七年嘅香港，用一個人身邊的人的背景去攻擊他，是文革時代的手法」。

選舉被質疑有外部勢力干預

大家可能覺得胡國興呢兩個反問，好似有啲不着邊際，實際上係寸爆漢奸黎滿口歪理、自打嘴巴。事關胡國興舉嘅例子就係講緊鬍鬚曾，鬍鬚曾早年隨父母移民美國，喺美國結婚生子，妻兒應有美國護照，而鬍鬚曾回流香港加入政府後，喺九七年主權移交之前曾出任末代港督彭定康（肥彭）嘅私人秘書，若以漢奸黎嘅推論，以鬍鬚曾嘅背景，係咪有英美外部勢力干預香港嘅特首選舉呢？

葛珮帆與前助理劃清界線

另外，葛珮帆亦發表聲明，承認鍾瑞珍係佢議員辦事處前助理，但鍾已經喺二○一四年四月離職，而鍾離職後嘅事務與佢無關，而佢亦冇參與胡國興嘅選舉工作。