中環出更：校長盃變告別戰 馬斐森齋睇
香港大學同香港中文大學以往都有舉辦兩大校長盃，由兩校教職員組成球隊應戰。適逢港大校長馬斐森同中大校長沈祖堯都唔再續任，呢場球賽變成佢哋以兩校校長身份嘅最後一戰，但以往有披甲上陣嘅馬斐森，尋日就冇「落場」踢波，只係坐喺場邊為球隊打氣。
上任後港大冇贏過
馬斐森喺開波前話，自出任校長以來，港大隊冇贏過，希望今次會贏波，可惜事與願違，港大隊最終以零比二輸畀中大隊。馬斐森解釋，自己在年輕時有踢足球，但現時卻疏於練習，加上自己球技麻麻，擔心會拖累球隊，所以選擇在旁打氣。被問到返回英國後會否踢波，佢話再作打算，但就話自己較喜歡睇比賽。
沈祖堯同樣冇落場，佢話自己不擅長踢足球，平時反而會打羽毛球。佢又話早前馬斐森落場時，見到班球員都似乎有啲尷尬，擔心因為校長身份會令班球員唔敢盡情踢，所以唔落場。沈祖堯又話幾位校長遲啲會為馬斐森餞行，而佢尋日亦送咗水晶帆船畀馬斐森，仲自拍留念添！
卓妮