中環出更：美食車成本高 蕭楚基「唔撈」
美食車先導計劃推出冇耐，已有申請人退出，卓妮尋日喺沙田馬場見到政府伙伴倡自強計劃諮詢委員會主席蕭楚基，本身做開食肆嘅佢就話，曾經都有諗過做美食車賣吓腸粉同炸兩，不過計過條數之後覺得冇乜作為，就擱置咗呢個諗法，認為如果申請者覺得冇得做，及早退出止蝕亦係明智做法。
蕭楚基話佢喺德國嘅時候都幫襯過美食車，買吓腸仔等小食，好多遊客好似佢咁行過肚餓就買啲小食，眼見都經營得唔錯，但反觀香港地方太細太稠密，周圍都大把嘢食，餐廳或便利店總有一間喺附近，如果擺偏遠啲都可能有人買，但擺喺鬧市中間大家又咁多選擇就真係未必睇得上眼。加上香港好多遊客都係內地人，佢哋喺香港識得捐窿捐罅好熟路，想買嘢食都唔一定會喺美食車買，單靠外國客數量又似乎唔足夠，所以自己都打消咗做美食車嘅念頭。
劉燊濤話地點好重要
香港工業總會青委主席劉燊濤（Gary）同太太吳奕筠都有入場，Gary話佢早兩個星期喺中環海濱參加一個長跑活動時都有見到美食車，本來佢都想襯吓熱鬧，不過大會安排得實在太好，所以冇機會幫趁買嘢食喎！佢又話做生意除咗租金之外，地點都有好大影響。
喺外國幫襯過美食車嘅仲有新界鄉議局前主席劉皇發女兒劉麗華，佢試過喺倫敦嘅美食車買漢堡包，覺得唔錯，但香港美食車開始咗之後佢仲未有機會經過去試。至於旅遊界老行尊黃士心見識過世界各地嘅美食車之後，就覺得曼谷有一種賣魚蛋粉嘅單車最得佢歡心，夠晒地道咁話，認為美食車售賣嘅食物一定要夠特色先可以維持。
卓妮