政情：甘文鋒搞體育 噱頭停不了
區議員經常舉辦各式各樣興趣班，方便接觸街坊，屯門區議員甘文鋒就主力搞體育。繼上年搵西甲勁旅皇家馬德里搞足球訓練營，最近更請到代表香港征戰奧運嘅姚潔貞教區內中學生跑步添！
邀姚潔貞教跑步
甘文鋒透露，因為認識姚潔貞所屬跑會人士，所以先能夠邀請到佢教跑步。不過因為唔好意思要姚潔貞遠赴屯門教班，所以參加者就要辛苦少少跨區去學喇。由於表現優秀嘅學生有獲提拔機會，都仲有唔少吸引力。
至於足球方面，因其選區內有人造草足球場，上年獲皇馬睇中搞足球訓練營，連證書、波衫都有皇馬隊徽，所以淨係皇馬牌頭已經夠煞食。甘文鋒話，運動係接觸街坊嘅好機會，難怪佢食開翻尋味，亦搵英超球隊愛華頓合作喇！