中環出更：梁太去舞會玩到「難分難解」
特首夫人梁唐青儀為唔少慈善舞會擔任過主禮嘉賓，絕對係經驗豐富嘅舞會常客。不過常客都會被突如其來嘅考驗難到，好似尋晚喺君悅酒店出席一場慈善餐舞會時，就令梁太遇上比撞衫更大嘅尷尬喇！
話說梁太着住件黑色晚禮服，外披一件珠片披肩，出席保良局周年慈善餐舞會。保良局主席郭羅桂珍等主人家梗要親自到門口迎接梁太，入場前例牌到大會所設布置企定定影合照。點知梁太嗰件鑲有珠片嘅銀色披肩隨即鈎到郭太嘅晚裝，不過兩人好淡定，實行影相第一。
擾攘半分鐘始「鬆綁」
影完靚相，郭太嘅丈夫郭少明幫手「鬆綁」，可惜兩位靚太係非一般「癡纏」，唔單止未能即時分開佢哋，仲要勞煩公關出手解圍。幾個人手忙腳亂圍埋一堆，令鈎衫事件更為矚目，結果用咗半分鐘先至搞掂。
呢個突如其來嘅意外真係幾尷尬，不過當梁太同郭太成功「分離」之後，佢哋就開心到拍晒手掌，齊齊歡呼「好嘢」！梁太仲笑稱佢哋係「難分難解」，實行以幽默化解尷尬！
卓妮