政情:立會提案抽籤黑仔議員九不中

立法會議員每逢立法會大會都可以提出無法律約束力嘅議員議案,透過喺立法會嘅辯論引起社會大眾關注議題嘅討論。不過由於議員數目眾多,所以都要抽籤,抽中咗先可以提出議案,其中立法會議員柯創盛(柯仔)同資訊科技界議員莫乃光(Charles)堪稱「黑仔王」,近半年抽咗九次都抽唔中;如果以政黨嚟劃分就以民主黨(白鴿黨)最黑仔,事關佢哋全數七名議員冇人抽中過,連該黨議員鄺俊宇(Roy)都笑言,一旦抽中真係好似中六合彩咁開心喎。

每次立法會大會均有兩名議員可以動議議員議案,不過就要抽籤抽中先可以提出,今屆立法會喺舊年十月已開鑼,但因為立法會宣誓風波持續一段時間,立法會大會多次腰斬,結果要到舊年十一月九日先首次可以進行議員議案辯論,變相令議員少咗幾次喺大會上提出議員議案嘅機會。

根據立法會秘書處最新資料,舊年十月至今,提出議員議案抽籤失利最多嘅係柯仔同Charles,其中柯仔話作為議會新丁,梗係要積極提出議案,但佢承認,抽咗咁多次都抽唔到真係「好黑仔」,大呻「又心急、又失望」嘅佢又表明會一直抽落去,希望可以提出同市民息息相關,涉及房屋同圍標嘅問題。

同樣抽籤多次失利嘅Charles,透露原本想提出同特首選舉相關嘅議案,但基於本月廿二日大會嘅議案抽籤中再次失利,即使喺再下一次嘅大會,即本月廿九日成功抽中,該議題都因為特首選舉完結而過晒氣。Charles認為,呢啲都係天意嚟嘅,唔會特別失望,但都會再諗吓有乜新議題喎。

白鴿黨七人八次失利

值得留意嘅係,抽籤失利次數多達八次嘅都有十名議員,包括白鴿黨全數七名議員、民建聯議員蔣麗芸、公民黨議員郭家麒同香港本土毛孟靜。

同柯仔一樣都係議會新丁嘅「乳鴿」阿Roy話,一直都好想透過提出議員議案辯論,令社會多啲關注動物權益同埋院舍智障人士安全問題,奈何至今仲未抽中籤,佢話會繼續祈禱,希望可以快啲中籤。

一句到尾,議員盡早「被抽中」,當然可以將對關注議題嘅想法建議,喺議事廳暢所欲言,如果再三都抽唔中都唔使灰心,相信只要持之以恒,遲早都會有天從人願嘅結果。

第一手消息請下載on.cc東網iPhone/iPad/Android/Windows Phone Apps