人不可貌相，有「史上最廢財爺」之稱的鬍鬚曾為了更上層樓，忽然神勇得交關，一改hea住做嘅本色，變身蠻牛，懶理中央是否對佢由紅燈轉為綠燈，第一個衝閘辭職：我要選特首！佢等到頭髮再白啲先獲批辭職，期間之煎熬相信佢自己才感受得到，如今總算上天不負有心人，佢又第一個交上足夠提名表格，成為有效特首候選人。
鬍鬚曾自參選特首後，一直把「爭取整個政治光譜支持」掛在嘴邊，又話要多包容先可以達到社會上信任，佢信心滿瀉，被問到勝算機會，佢就話「如果我冇信心都唔會行到咁遠」，「世界上好多地方選舉都見到，好多嘢峰迴路轉」。看來，鬍鬚曾已當正自己係一隻天才嘅「黑天鵝」。
中央都可算英明神武，早料今趟特首有可能失控，是以老早在特首的選舉條件上加上「中央信任」呢一條，政制及內地事務局局長譚志源更笑住解釋若中央不任命，根據特首選舉條例，將在七一之後的一百二十天後重選，在此期間由政務司司長署理特首之職。可見「不任命論」並非無的放矢！想柳暗花明，峰迴路轉，真係想創你個心！
鬍鬚曾為了入閘，以洪荒之力傾斜向泛民，所謂「爭取整個政治光譜支持」徒令識者恥笑，鬍鬚曾以為自己大愛包容，贏得反中亂港喉舌赤膊上陣，為其吶喊鼓吹便有了「正能量」，唉！一份連一個妨礙司法公正嘅監躉都可以亂吹亂捧成英雄嘅報紙，其誠信早已破產，鬍鬚曾卻以為執到寶，其能力及政治智慧未免要大打折扣！
回歸後香港諸事不順，一國兩制變質變味，中央的政策顯然出了問題，尤其在選特首上一再看漏眼，「選賢任能」的特首條件之上加上「中央信任」實有不得已之苦衷，一旦選情失控起碼有後着。傳統智慧教人「若要富，走正路」，從政亦然。可是投機分子就以為自己是另一個特朗普！