政情：議員問題多多狂燒3800萬公帑

陳淑莊郭家麒緊隨其後

立法會秘書處前日凌晨截收議員就預算案提出嘅書面問題。據了解，今年秘書處一共收到七千三百二十一條書面提問，同舊年嘅七千三百六十條相若，不過青年新政游蕙禎、梁頌恆舊年底被取消議員資格，實際議員人數只有六十八人，即係平均每名議員嘅提問量有增加。根據初步統計，今年嘅「問題王」係工黨張超雄，合共提出一千二百八十條問題，排喺後面嘅公民黨陳淑莊同郭家麒，分別提出四百八十四條同三百六十六條問題。

主席可裁走不相關問題

睇番上屆立法會嘅數字，提問最多嘅社福界前議員張國柱都只係提出八百四十多條問題，今屆張超雄竟然單獨可以提到一千二百多條，佔整體問題六分之一，都算非常誇張。據知，張超雄提出嘅問題主要環繞社會福利，好似老人院舍嘅死亡數字等，而最重要嘅係，工黨今屆只剩低一個議席，所以過去李卓人同何秀蘭關注嘅議題，張超雄都要幫手問埋，因為問題「三合一」咪搞到千幾條問題咁多囉。不過，政府同財委會主席陳健波都有權裁走不相關嘅問題，估計最終會剩番約六千多條左右。

其實議員的問題愈問愈多，政府已經多次「詐型」，財經事務及庫務局局長陳家強前年曾經提過，政府要求管理人員連夜趕工回答問題，令每條問題成本高達四千八百元，按照前年數字，再加上兩年來嘅通脹推算，估計今年一條問題嘅成本超過五千二百元，預計今年嘅提問成本將耗三千八百萬元公帑，打破咁多年嘅紀錄，粗略計算，單係張超雄就燒咗超過六百六十萬元。不過，政府如果想預算案獲得通過，解答議員問題嘅呢筆錢又點慳得呀！