中環出更：梅菜扣肉變小食宣客家文化
客家人是香港開埠前其中一批最早的原居民，當中新界更係好多客家人聚居之地，唔少客家文化更一直流傳至今，好似年前有政客被客家舞麒麟撞飛，就令大家對呢樣存在喺身邊多年嘅習俗忽然加深咗認識嘞！卓妮早前喺香港客屬總會舉辦嘅茶話會上見到主席梁亮勝，佢透露嚟緊六月份會舉辦一個與新界客家文化有關嘅大型水陸繽紛嘉年華，希望藉此進一步宣揚客家文化。
香港客屬總會執行主席曾智明就話今次舉辦嘅新界客家嘉年華，暫定六月二十五日喺科學園舉行，將會有多個唔同嘅項目，包括跑步比賽、單車同水陸比賽等，預計比賽會由早上八時開始，而叫得做嘉年華，梗係唔少得美食啦，屆時現場亦會設有客家美食等攤位，讓一家大細都可以享受親子天倫之樂。
設會所團結新界客家人
提到客家美食，唔少人都會諗起梅菜扣肉、鹽焗雞同釀豆腐等，總幹事彭叔平話部分菜式可能難以即場煮成小食販賣，或會考慮加入新意，舉例如將梅菜扣肉融入其他小食當中，或同美食車合作，但需再作商討。副主席陳笑權仲賣關子，話詳細情況會喺今個月再進一步決定，預期活動會吸引逾萬人參與。
出席茶話會嘅仲有常務副主席吳惠權、副主席張慶華同鄭倫光，以及副秘書長蔡立基等。講起客屬總會成立近六年，除咗會透過舉辦大型嘉年華吸引多啲年輕人關注同認識客家文化外，梁亮勝仲話新界係最多客家人嘅地方，所以成立咗新界分會同新界會所，深入基層，團結新界區嘅客家人，又指喺大埔呢個新會所嘅設備同總會有所不同，主要用作聚會食客家菜同傾偈，鄉賢可以多啲溝通同聯絡，拉近感情咁話。
卓妮