政情：謝偉俊怕醜仔 中學未拖過手
立法會議員謝偉俊（Paul）早前到一所中學出席活動，勾起中學嘅回憶細數往事。身為華仁仔嘅佢當年參加過唔少聯校活動，更從中接觸到唔少女校學生，但佢竟然話當年因為怕醜，竟然連手仔都無拖過吖！
學生時代追女仔實屬正常不過，阿Paul就話當年除咗靠聯校活動識女仔之外，亦都用盡動態同靜態活動，好似唱吓歌仔同彈結他，而佢亦都會打網球，果然動靜皆宜，可惜最後因為怕醜而無下文囉！
講起現時中學校規古靈精怪，阿Paul就話華仁比較自由，所以當年校規都非常正路，頭髮唔合規格只會作勸喻，而非強迫洗頭剪髮等。佢又話依家潮流興着吊腳褲，而當年普遍學生都會着吊腳褲返學，但當年並唔係因為流行，而係學生家境清貧需要着家人嘅二手褲啫。
佢更透露，當年神父更喺學校教飲酒。校風真係咁自由？佢解釋，神父只係畀祝聖酒佢哋淺嘗，話佢哋聽酒嘅味道係點啫！唔講清楚啲真係畀佢嚇親囉。