政情：補選爭櫈仔 建制鬼打鬼

民建聯（民記）前日舉行特別中委會商討補選人選安排，據了解今次係會前數日先突然發出通知，估計黨內出現激烈競爭先會盡早安排會議。會議決定就兩場補選舉行初選，係繼上年決定立法會功能界別區議會（一）界別後，民記再次以選舉方式決定人選。

初選七支部各提名一人入閘

初選提名期已喺尋日開始，投票期由今個月二十號至二十三號，二十五號將有結果，當區區議員、立法會議員、十八支部主席同民記中委都有票在手。九龍西三個支部同新界東四個支部各可提名一人「入閘」，提名期結束後將安排參選人介紹政綱。

有民記中人認為初選增加咗民主成分，比以「欽點」決定人選更令人信服，而且選票以排序全票制計算，能夠反映民記內部對各位候選人嘅優次，投票結果將有一定嘅參考價值。另外，每個支部為免成為拉票對象而得失其他支部，估計都會派人出選，預料會出現三人競爭九龍西、四人競爭新界東嘅局面。

早前盛傳油尖旺區議會主席葉傲冬，以及深水埗區議員鄭泳舜都有意出戰九龍西補選，兩人早已鬥勤力爭取表現，好似今個星期六將會同場出席墟市活動。據悉，兩人喺會議後已表達參選嘅意向，而新界東方面，北區區議員姚銘同埋沙田區議員李世榮亦都第一時間公告天下，大埔區議員胡健民亦聽聞有意參加。睇嚟真係會爭崩頭！

早前盛傳民記有意讓番新界東畀工聯會，但依家突然話要搞初選，仲包括新界東在內，不難令人覺得民記係唔想讓位，仲想霸埋個位添！

周浩鼎上屆獲力捧仍落敗

根據過往選舉結果，泛民與建制派喺新界東得票係六四比，好似上年新界東補選，民記周浩鼎獲建制派群星拱照，但最終仍以一萬票落敗，故民記派人與工記同場出選，必定分薄票源，無疑連僅餘嘅勝算都冇埋，所以有人指出，今次初選只為選出代表與其他政黨進行協調，即使勝出初選亦未必能夠真正落場喎。不過就信不信由你喇！