中環出更：王國強嫁女讚女婿冇「放飛機」
廣東社團總會榮譽主席王國強（KK）前晚嫁女，個女王沛芝同做民航機師嘅才俊李文偉（Raymond）舉行婚宴，數百政商界名流都去沾喜氣。一對新人係喺Raymond當值嘅飛機上邂逅，男主角對女主角一見傾情，締造咗呢段「空中情緣」。心情靚爆嘅KK盛讚女婿好叻仔，一眼就睇中個女，始終冇「放飛機」，希望佢哋「手拖手，一百年都唔放手」，妙語連珠，台下滿場笑聲。
KK笑笑口話當晚出席婚宴嘅賓客係「5**」貴賓，事關佢咁多城中老友，梗係請唔晒，惟有將二萬幾張卡片分為五級，經過一次又一次過濾，最終敲定數百宴客名單。難怪佢形容粒粒皆星喇！
霍震寰夫婦話嫁女順其自然
香港中華總商會永遠榮譽會長霍震寰同太太陳琪琪都有到場，佢哋嘅女兒霍思緯長得婷婷玉立，唔知兩人恨唔恨嫁女呢？佢哋異口同聲話唔急、順其自然，等囡囡成熟啲好啲喎！霍震寰仲話仔女有自己嘅諗法，唔到佢哋話事。至於個仔啟文呢？霍太就話，霍家人都係遲婚o架啦！
當晚到賀賓客如流水，KK大仔紹基同細仔紹恆（Rex）都幫手接送，忙到團團轉。KK育有三名子女，依家剩下Rex未娶，但佢就笑稱唔急，話要去「一帶一路」開拓基建商機，嚟緊五月佢就會到越南同泰國考察。Rex話希望令家族嘅工程生意，喺佢呢一代實現國際化，亦趁機將世界一流嘅香港基建技術輸出到其他國家。
卓妮