政情：卿姐鬧黨友為選舉塗脂抹粉
特首提名期將喺下星期三結束，擁有三十張選委票嘅民主黨（白鴿黨）不斷就提名及支持邊個參選人表態，又話會推薦畀黨內嘅選委添！該黨前主席劉慧卿（卿姐）尋日喺網台節目中鬧白鴿黨為「為小圈子選舉塗脂抹粉」，但指自己已經退下來，作為一個「庶民」會尊重黨友決定，若頂唔順就會退黨，但坦言目前仍未有退黨嘅需要。
擔心為符策略忘記原則
卿姐喺主持網台節目時指出，擔心民主派因為提名同投票策略上嘅考慮，而忘記咗為香港爭取普選、拒絕《基本法》第二十三條立法嘅原則，又質疑前財政司司長曾俊華（鬍鬚曾）同其他建制參選人嘅政改立場分別唔大，點解要支持。有選委就解釋，民主派仍然重視普選，而現階段民意係想一個有競爭嘅選舉，所以提名上就要令多個候選人入閘，但卿姐反駁話民意有時好民粹，又指民意之下仍然要堅持原則同理想。
然而白鴿黨喺上星期已率先宣布，包括該黨主席胡志偉在內嘅七名立法會議員將會一致提名鬍鬚曾，亦會推薦該黨嘅選委支持。
既然卿姐咁唔支持提名建制參選人，咁佢又點睇白鴿黨提名鬍鬚曾、要求「先送曾俊華入閘」呢？卿姐話自己依家只係白鴿黨嘅普通黨員，冇參加民主黨嘅任何會議，即使唔認同為小圈子選舉塗脂抹粉，仍然會尊重黨友決定，不過亦都希望有人會尊重佢嘅睇法。佢又質疑目前嘅情況只係中央製造嘅假象，質疑鬍鬚曾民望高，都係中央操縱出來。
促黨大會方式討論安排
卿姐又認為喺形勢難以預計而又瞬息萬變之下，民主派最好都係堅持爭取普選嘅宗旨，候選人要爭取民主派支持，就一定唔可以支持人大「八三一」決定，亦要說服北京畀香港人真正選擇；並承諾當選後喺政策制訂嘅初期，同各黨各派嘅議員磋商。佢又建議白鴿黨要以黨大會嘅方式，討論提名和投票安排，正如當年何俊仁參選特首都經過黨大會嘅投票，「當年我都係反對o架，不過支持何俊仁出選有七成，我得三成，咁咪去囉。」佢強調會尊重黨嘅決定，頂唔順就會退黨，但目前仍未有退黨嘅需要。到目前為止仍未有人正式報名參選特首，唔知卿姐尋日咁講係咪都希望白鴿黨嘅選委，聽佢意見回頭是岸呢？