政情:吳宏斌話港人送禮不拘節日

一般人以為節日會特別刺激市民消費,但從事珠寶生意嘅中華廠商聯合會副會長吳宏斌表示,早已預料今年生意額唔會因節日而上升,莫非佢對今年經濟睇法傾向悲觀?

其實吳宏斌有咁嘅睇法,係同港人送禮習慣有關。佢話歐美地區消費旺季多數集中喺下半年嘅節日,但港人就唔會集中喺個別節日送禮物,而係全年都可以,好似生日、紀念日等,所以全年生意都相對平均,即使係情人節嘅生意額亦都唔會有大幅增加囉!

推新款珠寶 增購買意欲

雖然生意額唔會喺情人節大增,但珠寶款式仍然要推出新款。佢解釋,若珠寶款式欠缺變化,會大大減低顧客購買意欲,所以每年都會不斷推出新設計。不過,情人節款式都離唔開心形,吳宏斌都直言要有變化都唔簡單,多數會喺鑽石嘅數目同擺位上作出變化。

另外,佢更對今年經濟抱有信心,因為發現全港普遍租金都有所回落,直指對中小企營商有幫助,能夠減輕營商成本咁話。希望承佢貴言喇!

第一手消息請下載on.cc東網iPhone/iPad/Android/Windows Phone Apps