政情：搞北京工展會 廠商會蝕住做
為咗慶祝香港回歸廿周年，中華廠商聯合會（廠商會）今年將舉行一系列活動。尋日廠商會會長李秀恒、香港品牌發展局主席黃家和同埋展覽服務公司主席戴澤良等一眾高層，齊齊蒲頭為六月底喺北京舉行嘅香港品牌節同北京工展會搞宣傳騷。雖然廠商會舉辦工展會賺到笑，不過第一次搞北京工展會就要蝕住做。
黃家和話今次品牌節活動獲得政府「BUD專項基金」資助五百萬元，品牌局及廠商會亦注入超過八十萬元作為配對資金，喺北京工展會場內設立專區展示香港品牌。
戴澤良就話喺北京租場搞工展會嘅成本好高，由搭建嘅費用、保安到清潔等費用，都貴過其他城市，就算計埋政府所資助嘅五百萬元，都預咗至少會蝕三百萬元。佢話廠商會曾經喺內地十三個城市搞過工展會，多數都有得賺，就算蝕都係蝕幾萬元。不過今次慶回歸意義唔同，蝕錢都無所謂喇！