政情：澳洲度歲 施家自製麻雀枱
中華廠商聯合會永遠名譽會長施榮懷（Irons）四兄弟出晒名齊心，早前佢哋同父母及家人一行十八人，齊齊飛去澳洲過一個熱辣辣嘅新年。Irons喺社交網站擺咗幾張靚相，眾人除咗享受陽光與海灘之外，見佢同父親施子清、大哥施榮怡同細佬東華三院前主席施榮恆仲開枱打麻雀，似乎無論去邊度過年，都不忘中國人過年嘅餘興節目。
Irons就笑笑口話此行最有趣嘅係要自製一張麻雀枱。佢哋將兩個梳化咕臣放喺圓形咖啡枱上，再鋪上由香港帶去嘅旅行裝麻雀布，就咁勉強砌成一張麻雀枱。Irons又話，今次旅程長達一星期，期間幾兄弟落手落腳去海鮮市場買餸，然後每人煮一味拿手好菜，其他人就齊齊幫手，成班人好似玩煮飯仔，諗起都幾好玩㗎。