政情：學生畫Q版素描 錢大康盛讚神似
新春期間，各間大學輪住搞傳媒春茗，尋日就輪到浸會大學。浸大最具特色嘅課程包括視覺藝術、中醫同傳理，校方特登安排幾位視覺藝術課程嘅學生，為大學管理層畫Q版素描，浸大校長錢大康當然要試下學生嘅素描功力喇！幾位學生玩接力，有人畫頭髮面形先，再分別換人畫眼、鼻同嘴，不消五分鐘，錢大康Q版素描就大功告成，主角仲大讚畫得神似添！
錢大康過檔浸大前，係香港大學首席副校長，講起港大校長馬斐森突然辭職，錢大康都話可惜，認為對香港係一個損失，但相信港大可搵到合適嘅繼任人，唔擔心香港嘅政治環境會嚇退有心人。
浸大擬再增宿位
錢大康又話，浸大正規劃未來校園發展計劃，會喺部分前李惠利校舍用地興建逾一千七百個宿位，同埋六千九百平方米教學空間。位於浸會醫院對面嘅浸大舊校亦正就重建方案諮詢師生意見，或拆卸大學會堂重建。