政情：梁福元間接累囝囝報碩士落榜？
唔少人都會一面工作一面進修，以增值自己，當中有唔少從政者都會修讀與政治相關課程。十八鄉鄉事委員會主席梁福元之子、元朗區議員梁明堅亦不例外，不過佢曾經報讀香港大學公共行政學碩士，但當時考官第一條問題便問其父係咪梁福元，隨後就問對丁屋政策嘅看法。梁明堅話至今仍然唔明點解考官會問佢爸爸係邊個。照咁講，唔通係梁福元連累阿仔落榜？
雖然不被港大取錄，但梁明堅現正喺浸會大學進修心理學，因為想多啲了解女兒。此外，梁明堅也曾修讀園林設計及樹藝師，希望為父親打理生意。梁福元屋企門前嘅花園，就係梁明堅提供設計意念，然後由梁福元負責落實。
梁福元就話，呢個花園有太陽能熱水爐等設施，又會每日定時抽走魚池水作灌溉，睇嚟佢都幾追得上智能家居嘅潮流喎！