政情：彭定康又回魂越洋廢噏干政
外號「千古罪人」嘅末代港督彭定康，近日又再「回魂」！不過今次佢唔係親身嚟香港搞搞震，而係喺老家英國透過接見到訪嘅香港眾志秘書長黃之鋒，越洋對香港政制改革同港大校長任命等問題說三道四。香港回歸祖國差唔多有廿年，但彭定康等港英餘孽，仍不時干預唔同嘅香港內部事務，香港警方早前仲專程邀請多名英軍來港，教導本地華裔警員點樣步操敬禮，究竟香港係奉行緊一國兩制抑或一國三制？依家係港人治港定係英人治港？普羅市民真係好難搞得清楚。
黃之鋒近日又去英國倫敦唱衰香港，不過日前佢同另一前港督衞奕信會面時，就畀對方質疑佢點解唔支持通過二○一七年政改方案，令港人失去一人一票選特首嘅機會。尋日黃之鋒再孖埋喺當地讀緊書嘅學聯前秘書長周永康，同出名「反中亂港」嘅彭定康會面，情況即刻唔同晒。
反政改 同衞奕信唱反調
據黃之鋒所講，今次會面原定只有十分鐘，但最後傾咗成粒鐘，好明顯同彭定康臭味相投。黃會後引述彭定康指，非常清楚香港嘅民主進程，仲支持佔領行動，反對兩年前嘅政改方案，並形容中國政府對普選有另類定義，即係要有篩選。彭定康咁講，擺明係想同衞奕信唱反調，幫黃之鋒「平反」。
港大校政風波 又加把口
黃之鋒續指，曾以港督身份兼任港大校監嘅彭定康，好關注港大近年嘅政治動盪影響學術自由，又質疑港大法律學院前院長陳文敏點解不獲任命做副校長。彭定康亦對同為英國人嘅港大校長馬斐森請辭一事表達關注，希望了解港大校務委員會主席李國章對校長繼任人選嘅影響。
黃之鋒又話，彭定康以「勇者（brave man）」嚟形容佢同周永康，並自言「我是過去，你們是將來（I am the past, you are the future.）」英文嘅past除咗解作「過去」，亦可以理解為「死咗」、「走咗」。彭定康都「走咗」咁耐嘞，仲越洋對香港事務指指點點，唔係「回魂」又係咩呢？