中環出更：難忘休學擴眼界 趙振國遊歷四大洲
香港社會近年嘈吵不休，年輕人與其作困獸鬥，不如飛出香港看世界。卓妮早前喺一個晚宴見到「假髮大王」趙振國及「美容教母」鄭明明（明明姐），明明姐講起當年去日本讀書時，同留學日本嘅趙振國他鄉相遇，自此成為好友。趙振國就難忘當年喺日本讀大學時休學一年，去咗非洲、南美、中東及歐洲遊歷三個月，擴闊視野，造就佢勇於創新嘅性格。
明明姐去日本讀美容時只得十幾歲，佢話趙振國介紹好多日本美容業嘅龍頭畀佢識，對佢日後嘅事業發展幫助好大，覺得好感恩。
體驗各種族文化差異
講起日本，趙振國諗起當時讀咗一年大學，喺爸爸支持下休學去遊世界。期間到訪巴西一位有錢人嘅屋企，間別墅大到要騎馬先至行得晒，令佢眼界大開，所以後來佢都擁有一座廿萬呎嘅私人別墅。趙振國又話，呢次旅行見到多個唔同種族，令佢明白各種族都有唔同價值觀，亦促使佢對各種飲食文化嘅興趣。
總裁協會理事黃偉鴻及太太黃王丹（Dawn）都有出席，佢哋都支持兩名囡囡外闖，大女就喺美國一間大學做交流生，Dawn早前去紐約探望喺當地定居嘅父母及大女，當地氣溫只得零下四、五度，所以佢哋就去南方嘅南卡州旅行兼避寒，點知遇上當地十年一遇嘅嚴寒天氣，Dawn笑稱凍到好似入咗雪櫃冰格添！同場仲有萬保剛集團主席洪劍峰，卓妮見佢狀態好好，原來最近忙於練拳擊健身，話投資健康最緊要喎。
卓妮