政情：競逐港大校長？ 梁卓偉未表態

港大醫學院尋晚搞春茗，院長梁卓偉被問及會唔會競逐校長一職，佢冇正面回應，但就指從事科研教育嘅人所追求嘅「步步高陞」與「打工仔」唔同，科研成就比行政職級更能代表成功，而港大深圳醫院院長盧寵茂亦坦言啱啱上任深院院長三個月，打算專心發展深院嘅科研平台咁話。遴選校長都要一段時間，唔知係時間尚早抑或一切都未明朗，所以佢哋先會咁講呢？

馬斐森都有出席春茗，被問到會唔會延遲離任期，佢表明已承諾新任大學校長嘅就職日期，所以唔能夠延遲，但佢相信港大有足夠嘅人才，應付校長真空期。

馬斐森辭職冇講 沈祖堯扮嬲

另外，一向同馬斐森關係友好嘅中文大學校長沈祖堯，尋日喺中大春茗都話事前無收到消息，仲講笑咁話：「我都嬲佢咩都冇同我講。」但佢不忘稱讚對方係個好校長，離任對香港係一個損失，但亦為馬斐森覓得另一份好工而開心，又話全世界政治環境都複雜，香港都不能幸免，作為校長嘅責任係要維持學術自由。沈祖堯早已表明喺一八年中離任，佢強調日後唔會加入政府做局長、甚至擔任港大校長，離任後希望到世界各地醫院參觀癌症治療嘅新科技。