政情：錢銀惹禍 講多錯多 乳鴿流年弱雞
近年建制派同非建制派嘅政治團體都積極培養接班人，有人已成功上位，亦有人喺中位浮沉，等待向上游嘅時機。香港術數家協會術數師楊子東就幾位政壇第二梯隊批算雞年運程。民主黨（白鴿黨）立法會新丁尹兆堅同許智峯（峯鴿）都需要小心錢銀問題，前者更有機會因財失義，惹上官非，而該黨有「鄺神」之稱嘅鄺俊宇（Roy）亦要小心言論，以免口舌招尤。
楊師傅根據出生年月日批算尹兆堅、峯鴿、阿Roy運程。一九六九年出世嘅尹兆堅雞年最旺係農曆四月，但一到五、六月忌神出現，錢銀方面就要小心，或會因財失義，九月亦易出現人事、錢銀問題，甚至惹上官非是非。
鄺俊宇忌赴西方國家
曾經因為用區議會實報實銷津貼派花紅畀助理而捱轟嘅峯鴿，雞年運程僅僅合格，正月、二月運程特別差，要小心錢財，搞唔好會有財政問題。九月就要小心錢財同身體健康，特別係心臟、血液同眼。至於一九八三年出世嘅阿Roy忌金水，雞年丁酉年旺金，會洩官星之氣，七、八月講嘢要小心，亦要避免去西方國家，否則健康會有問題。
喺建制派方面，由於青年新政游蕙禎同梁頌恆舊年被取消立法會議員資格，引發立法會九龍西同新界東兩個選區需要補選。政圈盛傳民建聯油尖旺區議會主席葉傲冬會爭取參加九龍東選區補選，而喺舊年九月立法會新界東選舉中敗選工聯會嘅立法會前議員鄧家彪亦有意捲土重來。
楊師傅話一九八○年出世嘅葉傲冬屬丁火命、係從勢格，用土及金，今年係丁酉年，對其有利。葉傲冬農曆一、二月運氣較差，惟三、四月就會好轉，七至九月更係其當旺月份，如屆時舉行補選，會有當選機會。
鄧家彪行運需待年尾
至於一九七九年出世嘅鄧家彪今年三十八歲，八字土旺，用金及水，惟其現時大運屬火，故此十年大運都唔樂觀。雞年用神係金水，由於大運唔好，故參選「入局機會唔大」。而農曆一、二月及五、六月都對佢不利，七、八月運程亦只係一般，要到冬季、即十至十二月先會較旺。不過運程分析信則有，不信則無，大家可用作參考，看看無妨。