政情：參賽遇星探 吳永嘉幾乎做歌手
民政事務局前常任秘書長楊立門有個綽號係「AO歌王」，唱歌靚聲人人都知，原來立法會都有位議員曾經有機會踏上星途，佢就係吳永嘉喇！話說佢大學一年級時參加完歌唱比賽後，當時有唱片公司寶麗金嘅高層搵過佢加入，不過阿媽唔畀，早就已經同佢講咗唔好打算喺音樂方面發展，所以最後都係告吹。
精通鋼琴羽毛球
其實吳永嘉可以話係隱形才子，除咗唱歌仲識多種樂器，十一、二歲就喺大會堂攞過鋼琴獨奏冠軍，十六歲已經係皇家音樂學院院士。而除咗音樂，佢運動一樣了得，當年除咗係港大羽毛球校隊，中學時亦同隊友贏過香港羽毛球雙打公開聯賽乙組冠軍。不過佢笑言依家把聲已不復當年，琴技亦生疏晒，但就仲有打羽毛球囉！
講起取消強積金對沖機制，吳永嘉就認為建議未有考慮到無限公司、一啲中小企甚至專業人士嘅處境，指僱主係無限公司嘅話，僱員係申請唔到破欠基金，要僱主破產先可以，而當年設立遣散費同長期服務金時，本港的福利制度沒現在完善，現時則有綜援及其他社會福利等。