中環出更：余嫿創商機 抗霾口罩玩3D
傑出青年協會早前舉行周年大會及聚餐，好多位歷屆傑青都有出席。大家傾開內地霧霾愈嚟愈嚴重，仲話原來霧霾都可以拓商機，其中本業係時裝設計嘅余嫿更覺得口罩設計上仲有好多發揮空間，但要靚亦要有效阻隔有害物質先得。
趙傑文（Calvin）早前去北京公幹，就遇上一片灰濛嘅霧霾天氣，唔單止影響能見度，就連空氣亦瀰漫一股燒焦味，而佢個口罩只用咗一日，表面就鋪上一層細灰，而當地人為咗對抗霧霾，出街除咗戴口罩，有啲人更會隨身帶備空氣消毒機。
Calvin認為若花啲心思，研發對抗霧霾嘅法寶，呢盤生意應該有得做。余嫿得悉北京居民對抗霧霾除咗緊閉窗戶就話要每一間房都安裝空氣清新機，佢認識有朋友覷準霧霾所帶來嘅商機，放棄本業轉行售賣空氣清新機。
講起對抗霧霾嘅產品，余嫿覺得口罩設計仲有好多發揮空間，除添加美術圖案以改善口罩嘅外觀，仲可以借助立體掃描，度身製作緊貼面形嘅口罩。但佢話要生產呢種口罩，首要條件係搵到科技公司提供相關物料。畢竟口罩不僅係講靚，有效阻隔有害物質先至最重要。
梁裕龍向辛小紅學拉二胡
梁裕龍（Dexter）跟同係傑青嘅二胡演奏家辛小紅拜師學藝兩年，當晚佢同師傅合奏《月亮代表我的心》同《賽馬》兩首樂曲。佢話自己身為眼科醫生，最怕失明，而失明又令佢聯想到二胡，於是佢就選擇拉二胡作為嗜好。佢仲開玩笑咁話，萬一自己不幸失明，都仲有拉二胡呢門手藝喎。
卸任傑青會主席嘅姜炳耀（Ben）更當眾宣布婚訊，準備今年同女友Ewa拉埋天窗。阿Ben話同Ewa識於微時，但後來失去聯絡，直至佢當選傑青後，對方向佢轉介更生人士個案，兩人先有機會再續未了緣。
卓妮