政情：速成預算案 波叔勉「強」餵料
國務院喺上周一免去曾俊華財政司司長嘅職務，並隨即宣布由本身係發展局局長嘅陳茂波（波叔）接任，但外界劣評如潮，質疑佢冇做過財政預算案，點解可以坐正做財爺。依家距離宣讀預算案只有一個月，但毫無公共財政管理經驗嘅波叔仲好有閒情逸致咁寫網誌，話自己已爭取緊時間同財經事務及庫務局局長陳家強開會討論相關工作，擺明係臨急抱佛腳，要陳家強「餵料」畀佢喇！
首發「財爺網誌」吹捧政績
波叔尋日首次以財爺身份發表網誌，講述佢加入政府做發展局局長四年幾以嚟來嘅政績，又形容自己可以坐正財爺係「有幸」，要感謝中央同特首對自己嘅信任云云。
篇網誌千四字咁長，竟然要到最後一段先提到自己嘅首要任務，就係全力籌備下一年度嘅預算案，仲話知道預算案涉及好多唔同層次嘅議題，社會大眾亦對預算案有好高期望，所以佢已經爭取緊時間同陳家強等財經官員開會討論預算案嘅工作。
早受外界質疑唔夠班
其實波叔甫上任就畀外界質疑佢「唔夠班」，畀盤數佢管係幫倒忙、添忙添亂，事關有熟悉政府財金部門嘅人透露，陳家強署任財爺嘅時候，其實已落筆寫緊下年度嘅預算案，如今波叔爬頭坐正之後就要自己重新寫過，一個冇寫過預算案嘅財爺臨急抱佛腳，自然要搵番陳家強餵料喇！
波叔喺網誌仲話會詳細考慮社會各界嘅意見，靈活運用公共資源，回應唔同階層嘅需要，促進香港社會同經濟發展。佢仲話深信只要經濟發展得好，配合適當措施，就一定可以讓各階層市民分享到經濟發展嘅成果，讓青年人可以一展所長。
距離發表預算案尚餘一個月，應該進入後期階段，波叔仲要好似填鴨咁畀人餵料，試問仲有幾多時間詳細考慮各界嘅意見呢？又點會令人相信佢嘅處男作，可以令市民分享到經濟發展成果呢？睇嚟呢啲都只係門面說話啫！
班泛民議員之前批評搵波叔做財爺係攞香港較飛，睇見波叔呢篇網誌就真係有啲心寒，唔知自稱「用人唯才」嘅現屆政府，有冇捉咗隻老鼠入米缸嘅感覺呢？