中環出更：頸椎痛體會深 韓嘉軒勸少玩手機
時下通街都係「低頭族」，頸椎疾病愈嚟愈普遍。早前卓妮喺一個晚宴上見到博愛醫院總理韓嘉軒（Maggie），佢就深受頸椎痛之苦，七節頸椎之中有五節都出現退化勞損，兩年嚟睇遍香港及台灣嘅中西名醫，個個都話要做手術，否則就會癱瘓喎！Maggie話連中醫都建議佢做手術，睇嚟真係冇計。病時先知健康無價，佢勸喻大家真係要少啲低頭玩手機喇！
Maggie唔係睇得手機多先搞成咁，而係因為工作。佢做珠寶鐘錶生意，經常要去世界各地參展，多年來成日搬搬抬抬，結果搞到五勞七傷。佢唔想即刻做手術，話要再試下瞓溫灸床，過完年睇情況再作打算。
當晚係博愛醫院候任主席彭少衍創辦嘅衍生集團總部喬遷晚宴，各界好友都去趁熱鬧，潮州商會會董蔡敏思（Mence）亦有到場。開男士健身護膚中心嘅Mence就話，香港人咁多痛症係因為工作緊張、冇運動兼唔夠瞓，佢有一套「被動式運動」療法，透過光頻、電流及超聲波等儀器組合，幫客人增肌肉、減脂肪，最近仲獲中文大學臨床證明有效喎。
彭少衍有眼光逆市擴張
同場仲有博愛副主席吳錦青、總理陳首銘及總幹事鄺國光等人，彭少衍太太關麗雯就忙於招呼嘉賓。商界都話經濟唔好，但彭少衍仲可以逆市擴張，斥資喺尖沙咀自置逾萬呎嘅寫字樓，認真唔簡單，佢就笑笑口話當係投資，物業買入幾個月已升值近一成嘞！
卓妮