近年本港各主要政黨湧現交棒潮，傳統上政治生命較短嘅工商黨亦苦思如何培養新生代接棒。經民聯喺前年區議會選舉後，原本只得十名區議員，但係最近該黨官網顯示，佢哋區議員數目已倍增至二十人。原來該黨不斷招攬有潛質嘅後生區議員加入該黨青年事務委員會，而青委嘅正、副主席分別係該黨元老梁君彥之子梁宏正及立法會議員林健鋒之子林凱章。佢哋打嘅如意算盤係吸納多名當選區議員加強樁腳力量，劍指下一屆立法會選舉直選議席。
轉會加入經民聯嘅區議員有油尖旺區嘅黃舒明、深水埗區梁文廣以及九龍城區梁婉婷等。經民聯在去年嘅立法會選舉中，席位數目原地踏步僅奪七席，當中只有梁美芬係循地區直選躋身議事堂。考慮到功能組別嘅「延續性」遠低於直選議席，亦難以開拓新席位，故經民聯已將目光放到四年後嘅直選議席上。
不過，工商黨喺直選中面對嘅主要挑戰唔單只係泛民，亦關乎建制點樣協調。另一工商黨自由黨早年亦曾挑戰直選，惟喺舊年嘅立會選舉終告全軍覆沒。況且梁宏正、林凱章呢啲「議員二代」畢竟唔係喺前線出道，無論選舉經驗或知名度都欠奉，要成功出線難度唔細。