政情：信用卡被盜用 邵家輝保不失
唔少人消費時都習慣用信用卡，不過使用時真係要小心，否則一旦被盜用損失無可估量。立法會議員邵家輝尋日自爆信用卡在美國被人盜用，幸好發卡銀行醒目，及時來電求證。
邵家輝話，有一個來自新加坡嘅電話連日來電，本來他不打算理會，點知一聽，原來係銀行嘅保安部來電，話佢嘅信用卡在美國進行海外交易，一共過數一萬五千元。邵家輝隨即表示自己喺香港，銀行即取消交易。邵家輝話，被盜用嘅信用卡信用額達六十幾萬，如果再被盜用後果可大可小。
經此一役，佢已經即時取消信用卡，而銀行亦表示佢唔會有任何損失。邵家輝話，好彩銀行醒目，一見海外交易就來電核實，今次都算係有驚無險喇！