政情：卿姐爆梁君彥執三攤做立會主席
前日特首梁振英（CY）出席立法會答問大會時，立法會主席梁君彥（Andrew）將播放錄音聲帶嘅議員劉小麗趕出會議廳，之後被民主派批評佢嘅裁決離譜，指佢濫用議事規則。尋日立法會前議員劉慧卿（卿姐）主持節目時大爆，喺北京屬意嘅立會主席名單中，Andrew只係第三選擇，難怪佢選主席嘅時候要拖到最後一分鐘先放棄英國國籍啦！
指葉劉及廖長江婉拒出任
卿姐尋日主持節目訪問專業議政議員梁繼昌，一開始就提到前日答問大會，頭五個發言嘅都係建制派議員，個別議員嘅問答時間更長達十五分鐘，卿姐作為前輩都覺得Andrew主持會議嘅手法離譜。仲大爆Andrew並唔係立會主席嘅首選或次選，排喺佢前面嘅仲有新民黨葉劉淑儀、商界廖長江，如果唔係兩人婉拒主席一職，根本都輪唔到Andrew做。卿姐仲笑言若Andrew一早放棄英籍，但最後又失落主席一職嘅話，就會成為雙失喎！
卿姐又爆料話，CY曾被港澳辦主任王光亞勸退，但CY無視勸退繼續爭取連任，後來中央就派出更高層官員命令CY喺四十八小時內宣布不競逐連任，否則「我（中央官員）就幫你宣布」，最終先至成功逼佢棄選。