政情：嚴人寬己議員呻窮博加薪

議員酬金及工作開支償還款額小組委員會首次開會，由進出口界立法會議員黃定光（象哥）自動當選主席，選完主席後就商討未來要討論嘅事項。今屆議員月薪有九萬五千多元，每年嘅辦事處營運開支就超過二百六十一萬元，仲有酬酢及交通開支共接近二十萬九千元。

夾硬同政助比 嗌津貼不足

議員譚文豪就話，依家議員人工好似好高，但對比政府問責官員體制，唔好講話同副局長薪酬掛鈎，就連局長政治助理都不如︰「政助都十萬，如果佢哋加埋人工，我哋只係佢哋七成！」議員陳克勤就話，依家議員實報實銷嘅津貼唔足夠，以交通費為例，油費升到嘭嘭聲，如果係超級議席嘅議員，服務地區覆蓋全港，交通開支好大，所以佢認為交通開支應該同酬酢開支分開申領。

辦事處租金貴 倡獨立申領

另一議員何啟明亦加入呻窮行列，話由於議員助理開支計入辦事處營運開支，如果辦事處租金貴，議員助理嘅人工就會被撳低，故亦建議辦事處租金及議助人工應分開申領。

議員胡志偉都話，直選議員通常開設多個地區辦事處，地區辦事處職員薪酬相當微薄，只有一萬二千元至一萬四千元，如果係超級議員，津貼就更加不足。佢認為，既然立法會選舉各地區選區及超級議席嘅選舉開支都有唔同限額，各區嘅議員營運開支津貼亦應該唔同，以反映服務地區範圍及人數嘅不同需要。

話時話，政府提出問責官員加薪，係因為高官成十二年都冇加過人工，議員咁都反對，但就大條道理要同自己加人工同福利，真係有口話人，無口話自己喇！