雖然有錢唔係萬能，但冇錢就肯定萬萬不能，尤其喺香港睇醫生，少個崩都唔得掂，就連公立醫院都磨刀霍霍向市民，你話喺香港做窮人係咪慘吖。
呢，醫管局早排先至放風話要全面調高公院服務收費，當中最狼死就係建議急症室由原本一百元加價逾倍至二百二十元，美其名曰打擊濫用，實際上係推卸公共醫療責任同埋打劫市民荷包。有民意調查顯示，多達六成半人反對急症室加價；七成八人認為就算加價都應該維持長者收費不變；至於最合理嘅收費水平頂多係一百三十元，呢啲咪叫民意彰彰明甚囉，官僚聽到未呀？
咁又係嘅，公營醫療係社會福利嘅一部分，基層居民直情靠佢救命，一下子大幅加價喎，仲要加到同私家醫生急診收費睇齊咁滯喎，咪即係叫基層有病都唔好求醫。最離譜嘅係，公院密謀加價，服務水平就不升反跌，仲要係跌跌不休嗰隻，淨係上個年度咋，醫管局接獲嘅投訴達到二千八百宗，比前年急增一成七，醫療事故更加係五花八門，無奇不有，連產科催生都可以變催命，唔怪得有人話一隻腳踏入公院，另一隻腳就踏入鬼門關啦。
搞成咁，咪就係政府對公共醫療承擔不足，前線醫護人手長期短缺惹的禍囉。最弊係未來十年嘅人手荒將進一步惡化，依家就話十個煲七個蓋，到時可能連五個蓋都冇，死得喇。雖然食衞局局長高永文話會增加醫護培訓名額及挽留人才，但講就易咯，一來培養人手需要時間，二來更多私院加入市場搶人，公院嘅流失率勢必雪上加霜，服務質素只會每況愈下。
港府本來諗住推出自願醫保為公營醫療減磅，為咗氹市民落疊，當初講到天花亂墜咁款，可惜廢柴即係廢柴，搞咗咁耐都係得個吉。大家有眼見，日前公布嘅自願醫保計劃大縮水，當局唔止放棄立法規管，緩設資金池，仲抽起「保單自由行」及「必定承保」兩大核心項目，甚至容許保險公司不承保申請人於投保前已有嘅疾病，咁咪即係形同虛設。一句到尾，港府搞唔掂保險界，到頭來又係走數，簡直唔知醜字點寫。
冇計喇，港府善財難捨，錙銖必較，庫房點水浸都好，高官一味以結構性財赤恐嚇市民，視公營醫療為包袱，削得就削，卸得就卸，以為將市民推向私營市場就一天光晒。呢幾年港府大力發展醫療產業，私家醫院一間接一間成立，連兩大龍頭公立醫院都撈埋一份，你話基層以後點睇得起醫生吖。香港人唔敢病，更加唔敢大病，所謂最長壽其實係逼出嚟嘅咋！