政情：保健心得 蔣麗芸靠戒煙拉筋
立法會議員蔣麗芸（Ann）平時喺立法會發言時都七情上面、好似好激動咁。做人成日咁勞氣好容易傷身，但阿Ann就話自己早排先去做例行身體檢查，結果不知幾健康，唔止血脂、血壓、血糖冇問題，醫生仲話佢個心臟好似二、三十歲嘅女仔咁，保養得好好。咁有乜嘢護心秘訣？佢就話全靠「Passion（熱情）」喎。
阿Ann平時發言大大聲，好勞氣咁，其實都係因為佢對任何事都有「Passion」，呢個都係佢嘅護心之道，因為咁樣都有助血液循環，對心臟有好處咁話。佢講嘅方法係對佢嚟講先得，其他人係咪都得？咁就見仁見智喇！
阿Ann又透露咗佢嘅保健心得。佢話自己已經停咗吸煙習慣，雖然平時喺屋企都會食芝士龍蝦、羊腩煲咁，每日都食包括麵包、麥皮、芝士、雞蛋同蔬菜嘅大份早餐添，但夜晚七點過後一定唔食嘢，，加上每日都會規定自己要步行四十五分鐘同拉筋，所以健康都算唔錯咁話。