政情：馬時亨「唔會跑」 2017身份不變
距離特首選戰仲有兩個月，有意參選嘅人士都陸續上水，甚至開始籌組班底。曾經做過問責局長嘅港鐵主席馬時亨（肥亨）尋晚喺港鐵傳媒BBQ上，被問及會唔會參選或會否喺新政府擔任財爺等職位，佢一律笑稱「唔會跑（口架）喇，慢慢行」，佢更喺致詞中強調「2017年身份唔會轉變」，仲話舊年已經同港鐵一樣有轉變，榮升外公，又笑說大家可以好似叫前政務司司長林瑞麟一樣，叫佢做公公。
整雞蛋仔靠師傅搞掂
可能因為嚟緊係雞年，肥亨喺現場整雞蛋仔，但其實係師傅一早整定，肥亨只係打開雞蛋仔模具，刮吓個邊，拎番底雞蛋仔出嚟。佢透露，自己好鍾意食雞蛋仔，而喺一九八五年時買咗雞蛋仔模具返屋企試整，但由於佢唔識調蛋漿，所以即使經過多番嘗試，最終都係失敗。
肥亨舊年喺海洋公園站搞BBQ，今年轉場到紅磡港鐵學院。今年同舊年一樣都有燒羊食，但今年就比舊年多兩隻羊，寓意「三羊（陽）啟泰」。唔單止有羊食，仲有酒飲，肥亨話呢種叫「合併酒」，因為酒嘅年份同兩鐵合併一樣，都係二○○七年。
被問及沙中線嘅進度，行政總裁梁國權透露，「沙中線」只係項目名，整條鐵路會貫通西鐵與東鐵線，所以稍後會改個新名。