政情：港大學生會 排異己走「獨」路

各大學學生會一直係孕育港獨嘅溫床，自港獨思潮冒起，唔少主打本土港獨嘅學生會內閣都成功當選。而唔少港獨友更以勇武見稱，喺校園內大搞抗爭，好似馮敬恩就帶頭衝擊校委會。聽聞，即將舉行嘅港大學生會換屆選舉，唯一嘅參選內閣「睿鳴」，其實係馮敬恩嘅嫡系傳人，政綱上表明「抵禦港中融合、溯本清源、建構港人身份」，仲提出要「不甘香港遭踐踏摧殘、勢為我土我城鞠躬盡瘁」，支持港獨、勇武嘅立場呼之欲出。

候任會長不反對以武制暴

據了解，「睿鳴」上星期已邀請學生會「老鬼」出席俗稱「con-day」嘅諮詢日，就佢哋提出嘅政綱進行諮詢。席間有人質疑學生會對港獨立場，候任學生會會長黃政鍀表明，支持「中港區隔」、又話唔排除勇武抗爭，對於以武制暴一事都表明唔反對，講到咁激，在場師兄師姐都一片嘩然。不過，佢哋就算不滿亦都唔能夠反對，事關今屆只有一個內閣出選，完全無選擇。

僅一內閣 勸退立場不同者

點解只有一個內閣出選？有熟悉港大情況嘅人就透露，有「港大朋黨」之稱嘅港獨支持者經常排斥異己，有其他唔少立場政見唔同嘅人想加入，或者自組內閣參選，最後都被勸退，而學生會亦成為只有港獨支持者可以圍爐取暖嘅組織。

其實，社會上大多數人都係反港獨，正如校長馬斐森曾經講過「港獨不可行、不符合大學利益」，究竟呢班大學生幾時先會回頭是岸，放棄咁不切實際嘅想法呢？