中環出更：保留歷史原貌 張鍾麗裳復修重承傳
喺維園迄立至今已一百二十年歷史嘅女皇像復修，遭關注團體批評銅像顏色變深、塗料太厚令銅像細節消失等，香港台山慈善基金早前舉辦嘅慈善晚會上，卓妮見到中國古董文物藝術修復專家張鍾麗裳（Lisa），梗係問吓佢有乜嘢睇法喇！
對於關注團體批評女皇像復修猶如破壞，有四十年復修經驗嘅Lisa就笑笑口話，復修最緊要唔好創造歷史，要承傳同保留歷史原貌，包括形態、皮殼同神髓，仲講笑話維修嘅人可能想將女皇像翻新都唔定。
當晚基金主席、懲教署前署長彭詢元同中華廠商聯合會副會長史立德（Allen）一早就到場，唔通佢哋都係台山人？彭詢元笑稱唔係，佢同Allen都係台山姑爺就真。講起台山美食，Allen太太史顏景蓮（Kimmy）就諗起黃鱔炒飯，事關細個媽媽經常炒畀佢食，但係少女Kimmy覺得滑潺潺而唔敢食，長大後先知黃鱔可以補血、補氣、去面黃，總之益處多多，先知走寶，亦嘥晒媽媽心機。彭詢元太太係台山白沙人，佢就話鄉下出產嘅甜水蘿蔔最好味喇！
彭詢元冀基金締造正能量
話說著名女畫家、嶺藝會會長伍月柳捐出春夏秋冬四幅畫供拍賣，金紫荊女企業家協會主席彭芷君好鍾意，仲成功買晒四幅畫添！見到咁多位好友支持，彭詢元梗係開心笑晒啦。佢話香港現正面對困難時刻，經濟不景，市民唔開心，基金希望締造多啲正能量，為中港有需要人士送上更多關愛同溫暖。
卓妮