政情:黃碧雲玩漂流都掛住抽水

立法會議員黃碧雲(一舊雲)早排同老公去咗馬來西亞沙巴旅行,一舊雲仲曬到幾乎變咗一舊炭,又話喺當地玩body rafting(人體漂流),當日見到身邊個個都玩,於是膽粗粗去試,玩完之後先至識驚,仲講笑話好彩冇畀水沖走,如果唔係真係報紙A1都有得上,補選咪多個位喎。

上唔到岸要人救

青年新政嘅游蕙禎、梁頌恆被取消議員資格,勢必要舉行補選。之前一舊雲先畀黨友寸全宇宙嘅水都關佢事,咁快佢又走去抽青政水?

一舊雲早前同老公去沙巴,聲言成年冇玩過水嘅佢話點都要玩夠本,仲膽粗粗玩人體漂流,即係落水瞓喺河度順流而下。

一舊雲就話見到身邊後生嘅又玩,肥嘅又玩,自己冇理由唔得,所以都膽粗粗試吓,點知最後上唔到岸,要人救起,但貪玩嘅佢就冇被嚇怕,仲話下次會向高難度挑戰。

同陽光海灘玩咗幾日遊戲,一舊雲曬到變咗一舊炭。佢仲話呢幾日都唔敢化妝,怕化咗妝面色白咗同條頸兩截色喎。

第一手消息請下載on.cc東網iPhone/iPad/Android/Windows Phone Apps