政情：公民講場：新空管貴夾廢仍死撐帳委會追殺民航「柱」

由前特首曾蔭權爵士任內構思同獲批逾十五億元購買嘅新空管系統，喺啟用以嚟「甩轆」事故頻生，但民航處處長李天柱仍死撐話冇事，以為成立專家小組同推畀承辦商改善就當冇事發生，點知立法會政府帳目委員會又再追殺佢。帳委會尋日舉行閉門會議後，決定下周召開特別會議繼續狙擊「貴夾廢」嘅新空管系統，有委員更私下透露，話會視乎民航處嘅回應，唔排除會要求帳委會再召開公開聆訊跟進事件添！呢次李天柱想甩身都難。