政情：向CY請願 陳家洛被翻舊帳
立法會前議員陳家洛尋日朝早聯同鴨脷洲及海怡半島居民，趁特首梁振英（CY）出席行政會議前到特首辦示威區請願，卻被CY翻舊帳，指呢度係五星紅旗飄揚嘅地方，反問佢「嚟呢度做乜？」佢批評CY並非虛心聆聽市民訴求，只為挑釁。
陳家洛與居民手持「還海濱於民」嘅示威牌請願，要求政府唔好將海濱用地私有化。CY出席行會前接收陳家洛嘅請願信，但冇再聽取佢嘅訴求，反而主動向佢講嘢，期間更一度指向五星紅旗。同場仲有支持CY施政嘅團體，CY同佢哋握手後，再度走到陳家洛面前說話，至返回特首辦。
CY問「做乜」 當人挑釁
陳家洛透露，CY同佢話呢度係五星紅旗飄揚地方，反問佢「嚟呢度做乜」，批評CY嘅言論係挑釁，質疑CY因政見不同而偏聽，忽略佢哋嘅訴求。
CY喺下晝發表網誌，指陳家洛喺前年接受訪問時話「五星紅旗升不起」，而舊年亦曾講到，五星紅旗升不起來，代表政權真的倒了。而佢尋日朝早只係向陳家洛指出，特首辦每日早上都會升起五星紅旗及區旗，歡迎佢嚟睇升旗。