仲有個零星期，狂人特朗普就會坐入白宮橢圓辦公室，可能有自知之明啩，佢老哥之前寫推文，將unprecedented（前所未有）拼錯成unpresidented（很不總統），畀人笑到面黃。其實號稱國際大都會嘅香港都唔執輸㗎，人哋有文盲總統，我哋亦有文盲警隊，呢啲咪叫同國際接軌囉。
話說秀茂坪警區被爆出舊年農曆新年大派應節福字揮春，點知擺咗個大烏龍，原本「齊合力，護法紀」字句居然寫錯成「護法記」，一字之差，謬以千里，祝褔唔成搞到要即時回收，唔知幾瘀皮。今日寫錯揮春就話閒事啫，難保聽日唔會寫錯指令，「拉人」變「放人」，「有罪」寫漏兩畫變「冇罪」，甚至乎「黑」都可以寫成「白」，「非」寫成「是」，到時咪天下大亂。
不過又難怪嘅，我手寫我心吖嘛，堂堂紀律部隊連「法紀」兩個字都唔識寫，未必係無心之失，而係證明有人不知法紀為何物，醜聞多過食飯，「黑警」個朵實至名歸。好在差大哥唔係生喺清朝咋，否則唔好話寫錯字，淨係成語「朝乾夕惕」錯寫成「夕惕朝乾」，激嬲皇帝老子，丟官失職不特止，殺頭大罪都有之！
講到殺頭大罪，警方絕對唔止寫錯字咁簡單。荃灣警區指揮官日前舉行退休派對，主角穿上龍袍扮演清朝皇帝，其餘伙記分別扮演大官、清兵、宮女、妃嬪以及太監等。試諗吓，班友如果喺清朝咁玩法，直頭係大逆不道，十惡不赦，何止殺頭，凌遲兼誅九族都有份！
警方發言人又點解畫呢？佢哋話喎，呢場喺荃灣警署警官餐廳舉行嘅清宮騷，主要係為歡送退休同袍，而當時出席嘅全部係非當值嘅警務人員。又係嘅，差大哥當值大把嘢忙，又要非禮報案人，又要監守自盜，又要向不法分子通風報信，邊得閒玩cosplay吖。不過咪話功夫茶玩踢爆，呢場清宮騷斷估唔會係心血來潮咁簡單，大家不妨睇番啲相，無論係服裝抑或飾物都非常逼真，怕且電視台拍宮廷劇都係咁上下，話唔係有人日思夜想都恨過番把土皇帝癮，三歲細路都唔信喇。
紀律部隊唔識紀，警官恨做土皇帝，講到底都係潛意識作祟。大家有眼見，警方唔係戀清，就係戀英，警隊禮聘英軍教步操，公然凌駕中央國防、外交大權，以下犯上，另搞一套，擺明就係想撈埋皇帝嗰份。始終都係嗰句，堡壘最容易從內部攻破，香港要撥亂反正，淨係針對小學雞政客係唔夠嘅，清理門戶捉內鬼，一樣唔少得吖！