政情：生育支援不足 譚文豪「兩個夠晒數」
有人話，養大一個小朋友要四百萬元，所以為人父母真係甚艱難，育有一對龍鳳胎嘅立法會議員譚文豪（Jeremy）就更加感同身受。Jeremy尋日同家人郊遊時，就用擔挑擔起兩個小朋友，雖然Jemery笑笑口咁，但過程都唔容易，佢更趁機大鬧政府喺生育政策上支援不足，令港爸港媽重擔大增。
參觀農莊 擔起仔女影相
Jeremy話平日立法會事務繁忙，佢尋日趁假期就陪一對龍鳳胎參觀上水嘅假日農莊。除咗陪小朋友餵飼豬牛羊等動物，佢亦用擔挑擔起載喺竹籮嘅兩個小朋友。佢話咪睇佢影相時笑笑口，查實擔起兩個小朋友並非易事，佢更加語帶雙關，話擔起小朋友除咗肉體上，其實精神同經濟上都有一定壓力。
佢大鬧政府依家對於生育政策支援不足，教育、住屋方面政策都未能配合，先至令一眾港爸港媽咁辛苦，佢未來會以用家身份，促政府改善生育政策，令香港人可以安居樂業。
已經有一對龍鳳胎，會唔會再「追多個」呢？佢就話同太太已經補充咗香港人口需要，暫時決定「兩個就夠晒數」，不過若政府日後可以提供足夠支援嘅話，或者會考慮生多個㗎！