每年六月四日前夕，泛民議員都會爭取喺立法會提出要求平反六四事件嘅動議，過去近廿年都係由身兼支聯會正副主席、秘書或常委嘅議員提出，包括已故嘅司徒華、最近幾年嘅李卓人同何俊仁等。但據聞今年嘅六四動議將改由民主黨主席胡志偉接手，令佢成為歷來首位擁有有效回鄉證嘅六四議案動議人。
胡志偉過往亦曾參與支聯會工作，幾乎每年六四燭光晚會都有去，但始終喺現屆支聯會常委會冇任何職務，點解會由佢接手提出六四動議呢？
原因好簡單，李卓人、何俊仁等支聯會現屆高層，喺去年立法會選舉唔係棄選就係敗選。現有三十名非建制議員當中，只有街工梁耀忠同民主黨尹兆堅身兼支聯會常委。其中阿忠已用咗佢今年嘅動議配額，提出要求將手語定為官方語言嘅議案。肥尹作為議會新丁，亦想留番個動議配額辯論其他民生議題。已唔經唔覺升格咗為資深議員兼泛民最大黨主席嘅胡志偉，惟有為其他黨友及非建制議員孭起呢個重責。
不過，胡志偉最終能否成功提出六四動議，仲要視乎其他非建制議員會否就今年嘅財政預算案發動拉布，因為過去三年嘅六四動議，都畀預算案拉布戰拖死咗，即係無法喺六月四日之前辯論同投票。如果今年又再歷史重演，胡志偉就可以申請更改動議題目，辯論番其他政治或民生議題。