中環出更：蔡加讚食檸檬 賣旗靠囡囡
香港義工聯盟尋日舉行傑出義工嘉許禮，嘉許逾二千位優秀義工。講起做義工，身兼聯盟常務副主席嘅「玩具大王」蔡志明兒子蔡加讚（Karson）細個都有賣旗經驗，不過當時途人直行直過，Karson慘食「檸檬」，笑言嗰一刻覺得好委屈。仲話日後帶囡囡賣旗時，要靠女兒做主力喎！
Karson笑稱細個樣貌都算可愛，但有次佢在街幫手賣旗，途人無視佢嘅存在，令佢心靈受創，因為細個面皮薄嘛！不過，Karson未有因食「檸檬」而放棄做義工，不時去探訪老人院，依家更加投身多項慈善組織。佢嘅大女現時兩歲幾，Karson仲話一定會帶佢去賣旗。
容海恩話最緊要微笑
靚女賣旗確實有着數。同場嘅立法會議員容海恩（Eunice）好自豪咁話，由細到大賣旗都未食過「檸檬」，成功嘅關鍵係微笑。Eunice話笑容好重要，笑到露齒最好，可以表示誠懇；其次係有禮貌，「先生」前「小姐」後，因為禮多人不怪。Eunice話，按佢多年嚟賣旗嘅經驗，小朋友雖然仍然最受歡迎，但係賣旗籌款成績最好嘅係親子組喎！
義工聯盟另一常務副主席馬浩文亦經常帶子女參與慈善活動，例如去深水埗區探訪低收入家庭，最大好處係可以令囡囡知道社會上唔同階層嘅情況。立法會議員陳恒鑌（Ben）都話會帶女兒去參加慈善活動，仲話近排仲經常同囡囡講以前自己賣旗嘅情況，鼓勵佢主動參與。
卓妮