香港成日自認國際都會，其實好多嘢都慢過人哋幾拍，好似公共單車租賃服務咁，巴黎、倫敦同台北等大城市一早已經大行其道，即使係羅湖橋以北嘅深圳，一樣搞得有聲有色，反觀香港仲係十畫未有一撇，仲有冇再落後啲吖。
呢嗱，沙田區議會最近就完善單車徑網絡聘請顧問進行研究，結論係沙田區人口超過六十五萬，有接近七成家庭擁有兩部或以上單車，加上區內建有逾五十公里長單車徑，總長度以至覆蓋率都係全港各區之冠，有條件搞自助單車租賃系統。顧問建議當局喺港鐵站、學校區及購物區、主要屋苑及馬鞍山海濱長廊等地，以廉價租出單車，認為既可以鼓勵綠色交通，又有助減少棄置單車，絕對係一舉兩得咁話。
查實公共單車租賃仲有好多好處。大家都知，依家潮流興深度旅遊，旅客已經唔再滿足於千篇一律嘅食買玩，踩住部單車優游自在欣賞大自然美景，成為唔少人嘅選擇。再講吖，政府購買單車所費無多，但就可以鼓勵市民踩單車強身健體，病痛少啲，睇醫生都少啲，公共醫療資源慳番好多，呢條數一字咁淺，連小學生都識得計。
咁就唔怪得人哋外國上至官員，下至平民百姓，好多人返工放工都係靠單車代步，基本上係生活一部分。當然喇，香港人唔係唔想踩單車，無奈唔係個個屋企樓下都有單車徑，唔通下下推架單車過去咩？家陣政府出錢買單車，市民興之所至，鍾意幾時踩都得。仲有喎，好多人之所以提起踩單車都怕怕，就係因為限定地點還車，山長水又遠，諗起都腳仔軟，有咗公共租賃服務就唔同嘞，只要拍一拍智能卡，就可以喺沿途多個地點還車，咁就可以量力而為喇。
不過講到天花龍鳳又點吖，官老爺闊佬懶理咪又係嘥氣。沙田區議會一三年已經委託大學就自助單車租賃系統進行研究，當時又係話有條件搞，甚至有社企願意承辦，以為萬事俱備，只欠東風啦，點知拖到依家都未有下文，簡直吹脹！
咪以為有咩難以克服嘅技術困難喎，其實只不過因為區內多段單車徑未能連埋一氣，單車客經常要推車橫過行人路，搞到鬼咁冇癮咁解咋。喂，本港單車徑斷橛禾蟲，已經畀人鬧咗N年，到依家都冇改善，你話班官係咪食塞米o架。
真係諗極都唔明，發展大嶼山、新界西北一類大project，港產官僚就話有心無力啫，連單車租賃咁簡單嘅事都搞到唔湯唔水，甩甩漏漏，想唔認冇神經冇知覺都唔得！