政情：尹兆堅寸一舊雲 乜水都關佢事
由上屆講到今屆嘅立法會東江水考察團終於成事，發展事務委員會尋日召開特別會議討論，最終獲全體通過，未來會喺內務委員會討論。不過似乎唔多非建制派參與，當中一向十分關注食水嘅民主黨（白鴿黨）黃碧雲（一舊雲），其黨友大部分都講明唔去，其中尹兆堅仲笑稱「全宇宙嘅水都關黃碧雲事」，咁講即明寸一舊雲？
非建制考察 憂會議遭突襲
個考察團喺下月十九日出發，二十日回港，會去東江流域水量水質監控中心、太園泵站及沙灣河等地考察。有非建制派議員就擔心，二十日會同立法會三個事務委員會、一個小組委員會會議撞期，所以仲諗緊去唔去，擔心建制派會趁佢哋去考察而玩突襲喎！
據悉白鴿黨除咗鄺俊宇同許智峯仲考慮緊之外，其他人就講明唔去。至於公民黨打算派楊岳橋做代表，專業議政嘅莫乃光、邵家臻、梁繼昌同埋葉建源，仲有朱凱廸就講明有興趣參與。