政情：戴耀廷未衰夠 搞「市民薦特首」
民主派早前喺負責選出特首嘅選舉委員會選舉中取得三百多席，近日佢哋正積極討論投票同提名方案。佔領行動發起人、身兼高教界選委嘅戴耀廷，繼搞出失敗嘅佔領行動，同埋拖垮泛民立法會選情嘅「雷動計劃」之後，又倡議民間公投，要求非建制選委根據公投結果投票。雖然唔少選委已經表明反對公投，但係佢似乎死心不息，近日又向部分選委提出「市民推薦特首候選人計劃」，指明若果有意參選特首的人士能夠取得三萬七千多個市民支持，參與此計劃的選委可考慮提名該人為特首候選人。
為候選人列三大條件
據了解，戴耀廷私下向部分選委發放「市民推薦特首候選人計劃」初步方案，建議提供一個平台，讓市民可以參與特首選舉。佢初步列出三個條件，只要特首候選人取得三萬七千七百九十名市民，即登記選民嘅百分之一推薦或支持；承諾任內盡力推動政改，不受「八三一框架」限制；以及捍衞香港核心價值，即可獲得提名。計劃會由香港大學民意研究計劃及香港理工大學社會政策研究中心嘅電子系統，去確認市民嘅推薦或支持。
不過，戴耀廷嘅建議似乎未得到所有選委支持，有人大鬧佢自把自為，違背泛民嘅部署，亦破壞當初想團結嘅原意，「私下傳出嚟，唔知佢想點」。亦都有人批評建議完全唔可行，提名一個特首候選人需要一百五十票，如果超過三個人符合資格，民主派根本唔夠票。
長毛唔排除參選特首
戴耀廷可能知道自己支持度唔夠，所以計劃聲稱會喺二月底嘅「選委商討日」再討論，希望會有共識，但就冇講到如果最終好少人支持，佢會否放棄。其實民主派拎到三百幾席選委唔容易，所以目前最重要係要得出共識，否則最終只會自亂陣腳，影響爭取成果。話口未完，立法會議員「長毛」梁國雄尋日忽然揚言不排除參選特首，又說唔一定由佢出選。乜佢唔係好反對參選特首嘅咩？點解一反常態呢？