中環出更：為碧咸學踢波 牛丸盼同場切磋
香港運動員近年屢創佳績，亦帶動市民運動氣氛。早前精英運動員協會搞咗一個慈善跑步活動，唔少運動員同體育界人士出席開幕禮，包括人稱「牛丸」嘅東方足球主教練陳婉婷、「牛下女車神」李慧詩、港產女飛魚歐鎧淳同埋港協暨奧委會會長霍震霆等人。陳婉婷自爆當年學踢波係因為鍾意球星碧咸，仲話希望有日可以同偶像踢波咁話。
牛丸呻話，有一次碧咸來港，佢咁啱身在法國，結果緣慳一面。講開做運動，牛丸除咗熱愛足球之外，亦鍾意跑步及踩單車，因為做運動可以保持身體健康，亦可以釋放壓力。咁多項運動中，佢認為踢波最易受傷，所以佢好注重熱身，費事跛咗教唔到人喎！
霍震霆兩歲孫仔都識游水
熱愛運動嘅仲有霍震霆，佢經常游水及打網球，仲話學游水係「家訓」，所以佢哋屋企個個都要識游水，依家兩歲嘅孫仔都已經識得游水咁話。霍震霆新抱郭晶晶有「跳水公主」之稱，固然識游水，唔通因為有家訓，所以連娶新抱都要揀識游水嘅？
李慧詩就直言好少跑步，因為平時練習單車已經係好大嘅運動量，而且跑步同踩單車發展嘅係唔同肌肉，所以佢好少長跑，就算跑都只係熱身時跑吓。
同場仲有和富大埔足球隊會長李宗德、教育局副局長楊潤雄同香港津貼中學議會主席潘淑嫻等人。李宗德話，因為以前整傷過隻腳，搞到腳骨發炎，所以之後都好少做劇烈運動，平時都只係靠行多啲路同注意飲食保持健康。
卓妮