港府冇嘢叻，只有兩瓣最耍家，一係吹水唔抹嘴，二係守財奴上身，淨係退休保障咋，就充分體現何謂算死草嘞。
嗱，現屆政府好快就壽終正寢，當初實牙實齒話要推動全民退保，家陣梗係畀人追數啦。尋日立法會退休保障事宜小組委員會舉行公聽會，有過百團體及市民出席，紛紛要求港府兌現承諾。不過有消息就話，港府點都唔會推行「不論貧富」嘅全民退保，只會喺最後一份施政報告提出，喺單身長者綜援及長者生活津貼之間，增加一層有審查嘅現金援助，金額大約每月三千四百元，資產上限就由原定嘅八萬元提高至十四萬元，求其對退保有個交代喎。
吓，咁樣就叫做有交代，有冇再縮骨啲吖？要知道家陣大部分打工仔都有供強積金，退休時資產雖然只得雞碎咁多，但就一定超出十四萬元上限，根本唔符合申請資格，即係有得睇冇得食，擺明呃人啫。再講吖，港府言必稱以民為本，家陣有九成民意支持全民退保，港府咁都可以當睇唔到聽唔見，簡直打橫嚟，有冇再離譜啲吖。正如關注團體話齋，呢個方案同退保大纜都扯唔埋，頂多係長生津嘅加強版，仲要長者鬥窮至有得申請，叫人點接受喎。
講到呢度，大家一定會問，港府坐擁金山銀山，除咗三萬億元嘅外匯儲備，財政儲備亦就快突破九千億元大關，簡直肥到襪都着唔落，點解偏偏對全民退保錙銖必較，仲一味搬出「結構性財赤」恐嚇市民呢？嗱，咁就要聽吓署理財政司司長陳家強點講嘞，佢老哥話喎，雖然政府現時有豐厚嘅財政儲備，但扣除三千億元未支付工程承擔及四千多億元公務員退休金負債後，實際得番八百億元左右，所以要審慎理財喎。
真相大白嘞，原來超過一半財政儲備係留畀公務員退休享用嘅，唔怪得港府一味哭窮喇。公務員薪高糧準，退休後衣食無憂，錦上添花，尤其係港產高官，閒閒哋幾十餅一個月，退休仲可以咬長糧咬到死，福利好到連美國總統都望塵莫及；反觀納稅人年年準時交稅，退休後望天打卦，仲要擔心臨老過唔到世，你話呢個係乜嘢世界吖？真係諗極唔明，唔通公務員係人，打工仔唔係人？唔通高官係人，納稅人唔係人？唔怪得人哋話香港係小部分人嘅天堂，大部分人嘅地獄喇。
古人教落，不患寡而患不均，不患窮而患不安。港府用行動話畀大家知，人人生而不平等，平機會不過係擺設嚟嘅啫。社會之所以動盪不安，民怨之所以沸沸騰騰，家陣知點解喇。